الشاعر: أحـمـد رمـيـلة

الشاعر: أحـمـد رمـيـلة



: السـيـرة الشخصية

تاريخ ومكان ميلاده : هو أحمد محمد آدم أرميلة . من بيت ( أبوعوصة ) قبيلة الفواخر .وُلـِـد في منطقة ساونو, جنوب اجدابيا , سنة 1937م
بدايته مع الشعر : ابتدأت هذه العلاقة مع الشعر كراوية لما يقوله كبار الشعراء وقد روى في بداية حياته لكل من : عمه خالد ارميلة الشاعر المعروف ,وجلغاف المبروك بوشعراية وحسن الاقطع....وغيرهم من كبار شعراء تلك الفترة الزمنية الحافلة بكبار الاسماء في عالم الشعر الشعبي الليبي , حفظ حتى لبعض ممن كانوا خارج التراب الليبي مثل خير الله الدجن ) من أولاد علي في مصر ,ولم يلبث أن تطورت علاقته بالشعر حيث أصبح يقرض شعرا من تأليفه وكان ذلك في بداية صباه
يجيد القراءة والكتابة, ويذكر انه تلقى تعليما دينيا ودروساً في القرآن الكريم, في النجع الذي كان يقيم فيه. معروف بإلمامه الموسوعي بالأمثال و الخواطر الشعبية وهي مقطوعات قصيرة منظومة شعريا ً تحوي في الغالب مواعظ وحكم الأولين
أكسبـته موسوعية ثقافته الشعرية مهارة أخرى وهي نقد الشعر , حيث تميز بالدقة فيه, فكثيرا ً ما يستعرض لجلاّسه , بعض ما يعنّ له من شعر الأولين أو من شعر معاصريه , فيقلـّب الأبيات َ والقوافي بطونا ً ظهورا ً , مستعرضا ً ما فيها من جمال , ومشيدا ً به . ومنبهـا ً لما اعتراها من ضعف ٍ بياني أو عروضي
كما يُعـرف عنه إلمامه بالأنساب وقد تم تكريمه من الدولة الليبية في العديد من المناسبات منها : منحه وسام الفاتح من الدرجة الأولى عام 1990م . في مجال الشعر الشعبي وغيرها الكثير وفي الفترة الاخيرة انصرف إلى نظم قصائد في غرضين من الشعر حيث لم يكتب في غيرهما وهما : كلام الاجواد والديني - منها على سبيل المثال : شيناه ياقطع الارحام ..ياريتنا ما جينا
---------------------------------------------
: تسجـيلات صوتية للشاعـر

الـــدّار

نـجع الجدود

قصيدتان: كاس الموت - ياللي عليك حسابي

روايته لقصيدة: انخمّـم علي نجع لحباب- للشاعر الكبير, جلغاف بوشعراية

ردّه على بيت لحسن لقطع





--------------------------------------------------------------------------------
القصيدة الأولى : مغير انواري


مغير انواري ..ومالقيت من نفـتش عليه اسراري ..موطي على طرفي

مغـير انعــدّه................... قديم الغلا لـسبط مخوتم يدّه
كيف الفريق لقور اللي له مدة ............ ذرت عليه الريح ماله طاري
صغيره لقي عمه وبوه وجده............. وخوه الكبير كتاب ربي قاري
انكان جيتهن جايل ايجي من حده .............عندي العقل يضّايق يحوس مداري
مواكير ضرّابة هميل الصدّة ................لريل اللي قرونه اتقول مذاري
على نجع زاحاه الزمان وعدا................ سبايل بلا سايل انجيب سهاري
تباعد ولوكان الدموع اترده ................ إن يرجع ولا كفّن دموع انظاري

مغـير سريـبه ................... تنقد علي الناس كيف انجيبه
وسامع سوايا في عددهن غيبة.............. ونا عالسوايا ما انريد انماري
وسكاتي على فاهق القديم وعيبه............. نحلفلك عليه انه سكات اجباري
ولكن تعتني ع اليسار انسيبه ...............من يومن على هانتي دراه الداري
الرزق مو على غية اقطاف عطيبة ........ غبا وين لو نقعد سنين قواري

امــغـير اجـراره..................... طالن وما عمره نهار توارى
ويزيدن مهاياته ان ريت دياره ................ع البال يخطرن ناظر مناظر ضاري
وسايقات سيات العزيز وناره ................ علي افزعي والحجاز ياس اقراري
ورا من مغرغز بالرقيق انظاره .............. جريت ودعيت بقي قليل ذراري
جيته وهو فوق العلام قراره .................عازق العصايب من شبوب بداري
وحـرّث اللي لقدار فيه خسارة.................. ونا ياجماعة ردني بـبــذاري

مـغـيـر اخـطـــوره ....................... لسبط اللي هالب العاتق دوره
ديما يخايلي وفيه ضرورة.................. تزيد وينما نذكر خطاه الجاري
ونذكر حباب حازهم تراب اقبوره ........... بوادي شوامس هل اطراف سحاري
نـزّالين كانوا في هشاش اديورة .............شابكات حـلا ّب ورتـم واجداري
الدايم الله لقيتا مهجورة ..................ديارهم مواريهن رديم الواري
ماتقول شالوا عاليدين اصقوره ................ولا اقتلوا في فج الخلا بـقــّاري
ولا بـرّكوا ادقــَــيني امدورم زَوره............ لجحفت اللي عيونها عيون بحاري

مــغــيــر ا بــيـــاسه ........... رضيت وينما حـجـّر جميل الباسه
ومنعن مواريده ولاخر داسه.................. قباله علي صوبه اركب حمــّـاري
ولاطلت منظرته ولا مجلاسه ................مع جرتي رديت نا وجضاري
وانكان جيتهم جايل يباتوا ناسه................ بلا حرب ليلته حجير طواري

مــغـيـر انــسـاتــر .................... علي ناس كانوا هم القبض الحاتر
واليوم طول مرجاهم غلاهم باتر............... كبير ياسهم بايع معاي وشاري
قضيب وضع لاماهم لقيه مقاتر ............... انسفه بيش ما يمشن معاه اقطاري

امـغـيـر الــســيــة ........... اليوم دون من كانوا اعزاز عليا
تمت خيال ديما يطارح فيا ...............سلطانها علي معقب غلاهم زاري
وراهم وما فيهم قضا مقضيه............... بلاش هكذي ضايع مشا مشواري

مـغـيـر خـطاهم ...................... وطول ياسهم لطن ايام غلاهم
الناس العزاز اللي علي سباهم.................. مضن اسنين من عمري ونا دهواري
متماسكا ت من عند الخناق افكاري .............. وبين ترك طاريهم وبين رجاهم
ادموع كيف سوقات النزيل الجاهم .............. عزاءالعين في مول الخدود اتراري



--------------------------------------------------------------------------------

القصيدة الثانية: ونا في بابك

ونا في بابك... خنتي العهد خاننك ايام شبابك.... يا من جفيتيني

ونــا نـشـكـيـلـك...................... وانريد فوق راسي م الوطاه انشيلك
اتخوني بلا سابق انذار نزيلك .............تبقي قليلة خير ما نحسا بك
وتلفي اطرافك وينما انجيلك ..............م الساعة اتنو ضي تنفضي في اثيابك
معا ادعاي مـَـن سقتي وراه رحيلك........... مااتريد تزهيبه ولا يزهابك
ونا نسال عنك مانهارانسيتك ................ وانتي انظرك طايش للخلاء ثاريتك
واخذك حنين الواردات القيتك ................ خبيرك معا درب الخلاف مشابك
بلا امداس تاطي في منامي ريتك .............علي شوك بالي في طريقك شابك
واقدعن وينما شانن مقاصد نيتك ...............عليك لاورا ردن اردود احرابك

ونـا لـبـريـــدك.................... امعقد شكاويي وماسك في ايدك
عشيرة علي سنة الله انريدك ............... متطايبين والشاهد وكيل اكتابك
وناوي بما نقدر اقدار انزيدك .............. وانديرلك نباء بيّن اينال اعجابك
ولكن خطا التعني محا تمجيدك.............. وهون امهياتك وطول اغيابك
وناوراك ياشوف الخماس الجيده............. نعيط ونجرى ماخطاك انريده
طويل فوق بو طابع نظيف حديده .............. انكان جيت تسفي ع الخدود احجابك
وانكان غبت يداير ايزوم رعيده ...............ويبقى نزيل اشبوب نوك حابك
ورزقي علي امقسم ارزاق عبيده.............. انكان يا مرادي ما نصيبي جابك

ونـا مــخــتــارك........................ ودايلاتني فاهق خطاك ونارك
يا اللي ان تاقن تحت من جرجارك ..........يـضاون امضاوات البروق اكعابك
ايحوس المدار عندي ان ريت اديا رك ..........ومابي ولاحاجه امفيت اسبابك
بالله ليش يالخايلة انجيت اصدارك .............. اتجي من بعيد اتغيري مهلابك ؟
ونـــــا دهــــواري ....................... قاعد علي شانك اسنين قواري
وانتي خطاك معاي مو متواري ..........بالعيب تفتحيه وتقفليه وجابك
عليك م الدموع وم العشم يا ناري............. قطعتي رجا عاشق يريد جنابك
بعاد المواجع طيبين الطاري.................. انعده فنا كيفهم سريب منابك

ونا مــن عـازة ...................... شينة اتخلـّـف في القلوب حزازة
وانعاني ولكن قـلة الحجــّازة ..............خلتني ونا صاحب احقوق انهابك
ديما ابقيتي للخطا منحازة ..................يزيد يتمادى كل يوم عيابك
على ايدك ونابيدي بري نجـّازى............ وراك نار ياويلك نهار احسابك

ونـــا مـــتـمــنــي ................... قسميتك وما طلتك انظرني كني
سكـــّــر طريقك ياس حازك ...............عني زواك نين دقيتي بعيد اطنابك
غلاك وخطاك مع بعضهن جني ...........حتى وهن فواهق سود كيف حجابك
والباب شرع ما تلقي اجرا داينـّي............ قدام حجتي ساهل يكون غلابك

ونــا لـك نـايــل ..................... نجري وراك وشي ماني طايل
انجيت قاصدك نلقاه دونك حايل ............ اطقاق ياس ما ننظر بياض انيابك
وانعاود انجازي غيظ واجد شايل ............بالنقص دوم ايشيرلي سبـّابك
الحال صاف ياشوف الخماس الخايل......... انعان وين ما فـلّـت ربيع اسهابك

.......ونـــــا فـــي بــابــك


--------------------------------------------------------------------------------

...القصيدة الثالثة: مـا تقـول فـيـهـن كــانـوا

ما اتقول فيهن كانوا... اسماح المنازل وين ما يدّانوا.. أجواف يصهدن

ما اتقول فـيـهــن حطــّـوا ..............رجّـاله ا حدود الله ماايتخطوا
عن واجب صلاة الفجرما ايتبطوا ........... وذكر الجلاله ماعليه ايوانوا
اديارهم امقبل وين ما ايتوطو ..............قدام الجوازل نازلين ايبانوا

ما اتقول كانن قبل في هـاللـفة ..............قدّام الجوازل فيه بك نعرفها
تريس ولقيح ونجع داير ضفة.............. رفقهم حليب وحب ماينهانوا
اصحاب المروة والحيا والعـفة.............. اللي لقربهم جيرانهم يطمانوا
منهم وم اللي سود روس شعـفها ..............خلـيـَـن هوادين الخلا سبحانو

ما اتقول فيهن ضاري.............. كنا ننزلوا من قبل هالصحاري
واقناتن يلـقـّن من اشبوب بداري.............. ا رعوده اتـّل ومزنته تدغانو
نبت قيقلانه في ا رمال قعاري.. ............. بهارير لجـّاته اتقول اجنانوا
الملح البساط وطيبين الطاري .............. مـسـّع نهار اقدرت ع النسيانو
عليهن انجيت هالب ايحوس مداري........ منازل اللي تحت التراب ادفانوا
الدايم الله مالك الملك الباري.............. من هول السعير بقدرته ينصانوا
مسـيـّر احكام الكون وامره جاري.............. رافع السما عالي بلا عمدانو
العالم بلفظ الجهر والمتواري ..............تلاقيه يوم العرض ع الميزانو
جعل كل نفس لها ملف إداري.............. وبما قدّمت لحسابها ترهانو

ما اتـقــول ياخــرّامـــة ......................نزل نجع واجد فيك دق ارمامه
شيابه اكرام ويعرفوا الكرامة.............. لا يشهدوا بالزور لايفتانوا
واحذاهم لقيح اسمان دار اكلامه ..............ا صغار هله والرعيان فيه يعانوا
من يومن مشوا منك وفيك غمامة.............. وريـبة وانا وانتي عدو نـشـّانوا
عارفه انجاك اللي ارقاق عزامه ..............عليه يخطروا وايقول يانا يانو

ما اتقول وين تعـلاّ.............. نزيل البداري والجوازل ملاّ
رحـالينهم جـبـّن اتقول محلة ..............علي هـَـود بين الربد والظلمانو
لقوهن هناك مطوحات الجلـّـة.............. عقاير اكبار ابعاد ع القيطانو
منازل ابوادي طيبين الملة ..............ع الفطرة طبيعـتم صفا واحسانو
يجتنبوا جميع اللي ا محـرّم كله.............. فناهم الدهر ولا نبيهم خانوا
قـدّام دارهم ديما اهناك امصلـّى ........... طوايف ايجوه ويرفعوا لاذانو

ما اتقول فيهن سنـّـدوا يابابا .............. ثناوي لقيح واجد بعيد عقابه
والجازل امقبـّـل صابـّـات ارقابه ........من ميحة بداري فاوّل الخرفانو
خلين منازلهم اللي جوّابه.............. من وادي المرا لاعند بالحيضانو
بوادي شوامس حيلهم ضرّابه ..............لصيد الخلا واثقال ع العدوانو
فنتهم الدنيا هابتين وهابة.............. يامي ناظرة من اشداد ولانـوا
الدايم الله وين النبي واصحابه .............اللي ع الحياة بربنا استعانوا

ما اتقول بين انقوبة ..............ملـثـّم عليهن دَور داير كوبة
زناكيل جلبوبة ورا جلبوبة ..............كيف المراكب سنّدوا رحلانو
معا سيل متقاوي نزيل اشبوبه ...........اليوم لولي واليوم لاخر ثانو

تناشوا ربيع ابساط فيه اضبوبة ........... تظليمة اجباله كيف نوبة كانو
وللبل اللي ما كيفها مكسوبة .............. ماخير منه وطن في لوطانو

ما اتقول عمره جاهم ... .............. الجار الغريب وعاش في ردّاهـم
نـسـّاه الحبايب والقراب دفاهم.............. جربهم القيهم هل كرم وامانو
غليو عليه اقبل العيش امعاهم ..............ابعاد المواجع طيبكم جيرانو
بروايتين ورش وحفص حيل اقراهم ...... اصواتم اتجلي ع الكدي لحزانو
مواعين ديما صافيات انياهم ............. لاعندهم لا زود لا انقصانو

ما اتقول فيهن قابـــل ... ............. اركيـّب اسمان ونبتن متخابل
حطبهن هظاك السمح رايح ذابل......... لجواف والروامص والحباب انعانوا
فيهم عزا مازلت ماني قابل.............. ادموعي عليهم مالهن شي وانـو

ما اتقول يارجّـالــه .. ............... اركيّـب ضنا عثمان من جفـّـاله
لزياق البلط يقرن وهي تفـّالة ..............كبيرة العقاير واسعة لركانو
من ميحة امزان ارعودهاتلتالة .............. فاوّل تـكوبر نوّضـت وديانو
رقيت اتطوح فيه ع الجلجالة ..............رقيق الحطب م الغوط والشطبانو
لمست ابساط اربد ايبان غزاله.............. جلايب , جلايب ملية الحيوانو
دبيب العدام هضاك له قـتـّاله.............. ان لعبت اودارت ع الجمل حورانو
وتربع اوين القيض جا ميجاله ..............تهلب ثقيل النوم ، م الرعيانو
من قبله اتجيه وفيه تاخذ داله.............. قدام بلغـرب ديما لها معـطانو

ما اتـقـول ويـن الـذاكــر.. ............... توضا لميعادالصلاه الباكر
سود م العرق جبن اتقول عساكر......... اسماح الندا في الفجر ع الفرقـانـو
واصبح الغوش بخيرحامد شاكر.. .......... في احسن طناطين الزها طربانو

مااتقول يوم الشيـله....................... من جوف لـثـل وارقابه وجوف لثيله
نزل في امويزر نجع عيت ارميله .......... اتقول في الناس القواري زانو
ولااتقول قدام الفقيه عويله.. .............. في المغـرب تلو ح**ين م القورآنو
ولا اقرب حليب وحمل و افي كيله..........مصرم علي هايج اقلالي قانو
الدائم الله اكملو هـم واكحيله ..............وخلين منازلهم ايام زمانو

مااتـقــول بين الــجــــازل ... .............. واخشوم الوامص نازلين منازل
ولا بات قبليهم لقيح زلازل ... .............. حدايجه اكبار او زرق في للوانو
يسقوه الحليب اوما اتجيه مهازل.............. الجار المجاور فيه ما يشيانو

مااتقول حــاش عـليهم... .. ............... الشـول المقاوي لاسرح قبليهم
ولا اتقول كانت م الجريد اتجيهم ..............قوافـل ولا دنّو اجمال اخشانو
ايحوس المدار عندي بعـد نطـريهم ............ حبايب الله واكبر فـنـو افـنـيانـو
وفي اخرّ كلامي فاتحه انعطيهم ..............اجعلهم معا الصادق بـني عدنانو



--------------------------------------------------------------------------------

...القصيدة الرابعة : شيناه يا قطع لرحام
شيناه يا قطع لرحام ...................ايباعد الناس القرايب
تلقاهم ضنا عم واسلام ............. اوبينهم اتزيد الغبايب
عداوا ت من عام لاعام ............. عمارهم فنوهن قلايب
اتقول عندهم غيب ليام .............. مضمون من جميع الشوايب
ولاايطولهم جور لحكام............... ولا النار يوم الحسايب
امنين الحجر تحت لقدام ............يبقى اتقول قطران ذايب
مكان تنحشر فيه لقوام............... سماه وصف دخان ثايب
وما يمتسك سام في حام............. ولا اعبيد عن زيد نايب
يغيرن علي كل نمام ................حيات يا خذنه نهايب
والطايعين لله في انعام............... واثمار طيبات الهبايب
امثال جابهن فكر كلاّم................ كبير سن لله تايب
را الدم فالدم عشّام............... ورا ا دعا المظلوم صايب
سكين ينغرس بين لكمام .............رقيق شفر مسنون طايب
وراه البطر سيل هدّام............... للناس دوم لتعاب جايب
كمين صف له طبل واعلام ..............جلا ّهم وراحو ذهايب
سابقينا امغيرما دام................ دلالهم اسنين العجايب
بين ريح واتراب ردّام ...............القينا اديارهم خرا يب
قديم الدهرهك برّام .................مع الزين والشين خايب
ولا مواخذة فقد لكرام ...............خلا العقل حاضر وغايب
انحوس وين ما جيت لوهام ............منازل اسماح الدرايب
ركابين مرفوع لسوام ................الوافر سليم النجايب
إن كان سامر النار مانام ...............ايجيب الطوارف هذايب
معاك يوقـفوا كيف تنضام ..............لجواد هم اجمال الصلايب
اصحاب نقب مشهور لمـّام............... للجالي قليل الحبايب
ينال بينهم طيب لحلام .................بعيد من هضيب الهضايب
مايخاف ياذيه ذ مـّـام ................يطول فيه بسوال سايب
نزيل ناس هل شيخ لازام ................شديد عزم ينهى العايب
و انجاه واسطة خير يلتام ................يوازي كبار المصايب
يفوت عظم مكسور دمـّـام ................ومازال تحت العصايب
واتبات كلمته قيد ولجام................ للي كلامهم موش رايب
يملوا بطونهم عيش وايدام ............... وايهارجوك بأدنى سبايب
لا يعرفوا روس لقلام .................ولا يكبـّروا شيب شايب
على حكم لخلاق بعدام ................ملوا م الدراهم حقايب
ولكن بعد جـر لظلام .................وارياهم البيض العكايب
اسـّـاع يصبحوا بـور واحطام ................ويسوقن عليهم ضبايب
وعار كيف بنيان لهرام .................من غير الربا والنكايب
قول قال خطـّاط رسـّام................ أوصاف ناكرين النسايب
لحاليح واشدوق ورّام................ وافواه يطلقن في نشايب
حتى بسطهم شين لنغام .................خليط من انواع الهزايب
هم وجوه تزوير واخصام ................ انكان انت هاذين هايب
ناسيين تسكير لنسام.................. بلحود واثقات الترايب
وامدانات ثعبان هجـّـام.................. عيونه معاهن لهايب
ينزل الطير لو حام ما حام.............. يقولن امثال العرايب
مايجيـبهن لزم لـزّام................. اخطاهن اطوال النوايب
مامن غـنـي كان غـلاّم................ عليه بارمات الزرايب
امفـطـّم افطامين وافطام ................وبيوته يجوهن جلايب
بين ضيف طرقي وجلاّم ................وبين من يشيل الزقايب
واحذاه بـرّكت قدو رزّام ................. افراق من عراض الجنايب
صـدّار من هوادين صيـّـام................ زمازيم ليقة كتايب
على نجع نزال قدّام................. اجبال عاليات العقايب
كان واختفى شبه لفلام ..................وغابن معاه الطرايب
الدايم الباري العـلاّم................. ناشي اثقال السحايب




--------------------------------------------------------------------------------